شنو الفايده من حل المجلس

يوم الأحد وصلتي أخبار أن الأربعاء راح يحلون المجلس حل دستوري و فعلا صار هذا الكلام. لكن السؤال اللي محيرني و أنا مو خبير لا بالسياسه و لا غيرها شنو فايدة الحل إذا كان نفس النواب راح يرجعون و نفس التأزيمات راح تصير. هل هذا الحل الدستوري تصبيرة إلى أن يحلونه حل غير دستوري في 2010 وهو من المتوقع ان يصير هذا الشي؟

إلى أن يتغير تفكير الناخبون و الناخبات في طريقة اعطاء الصوت لمن، المنتخبين ما يقدرون يتكلمون و لا يقدرون اذمون في المجلس. لأن هذا هو اختيارهم. إلى الآن أشوف جدام عيني الناس يتناقشون شلون هذا بعطيه لأن من الطائفة الفلانية و هذا بصوتله لأن أبوه يصير حق يدي ولد عم خالته (يا خل أبوي حك ظهري) ما راح نخلص

اللي يبي تغيير و يتكلم عن التغيير خل يغير الناس اللي يصوتلهم! يا أخي صوت حق ناس ما عندهم لا مذهب ولا دين، يعني ليش اذا ملتزم تصوت حق واحد يكون يصلي و يصوم؟ صوت حق واحد يفيد البلد و قراراته لها تأثير و همه الوحيد الكويت و مو عايلته أو قبيلته أو طائفته. لا تفهموني غلط و لكن انا أشوف المذهب شيء معين و السياسة شي آخر لكن للأسف الناس و السياسة دمجت الاثنين مع بعض فصارت الطوائف الدينيه و المعتقدات الدينية طوائف سياسية مو بس ب الكويت و لكن في كل البلدان

نبي نتفق على التركيز على 5 نواب من كل دائرة، نواب يكونون اصلاحيين لا ينتمون لأي تجمع ديني معين و لكن بالامكان ان  يكون ينتمون حق تجمع سياسي اصلاحي لا يتأثر بقرار جمعيات أو مفتي أو أي شي آخر

قد يعتبر البعض ما كتيته تافه و معاد أكثر من مره و لكنه من باب التذكير، ولكن بما أن الانتخابات الجايه ان شاء الله الكل يصحى و يبطل عينه عدل و اعرف يعطي صوته حق منو. أكتفي بهذا القدر

عبدالرزاق